بديت بإسمك يا عليم بحالي
يا خالق الإنسان من ماء وتراب
يا الله يا الله يا عزيز الجلالي
يالواحد المعبود يا رب الأرباب
غيرك أنا يا خالق الكون مالي
أنت الذي تبكي لك عيون وأهداب
يا منزل من المعصرات الزلالي
يا قاسم الأرزاق يا رازق الداب
طالبك سترك من زمان غدى لي
كله مآسي والفرح سجّل غياب
الموت ما يعرف سمو ومعالي
غصب عليك إن جاك تفتح له الباب
ذي سنة الدنيا ولازم تقالي
الموت واحد ولو تعدد بالأسباب
مهما ملكنا من الذهب والريالي
مصيرنا نسكن وسط لحد وتراب
ما المشكله الموت وفراق غالي
وترك الأهل والمال وعيال وأصحاب
المشكله من بعدها وش يقالي
يا من نكير الموت للأسئله جاب
يا قام يسأل وأنت مالك موالي
هل يا ترى حسبت للموت حساب
يوم الولد يقول مالك ومالي
والكل منا مستلم بإيده كتاب
حتى أمك اللي كنت عندها غالي
اللي ليا منك تأخرت ترتاب
اللي علشانك طوتها الليالي
تنساك ما كنك ولدها الذي غاب
لو تطلبها يوم القيامه مُحالي
لو تترجاها تقول أمسك الباب
وأنا بشر أقضي ولو ما أبالي
لو قلت مالي ذنب أكون كذاب
يالله أنا ذنوبي صار لها ظلالي
وأنت الرحيم اللي تسجد لك أرقاب
يالله ياللي منزلك فوق عالي
يا خير من أهلي وربعي والأقراب
أطلبك يالله تستر اليوم حالي
يا من دعاه المستجير أجاب